.
RY MPITONDRA DISO LALANA
Malagasy tena noana no terena hibaby trosa
Fa hofohazina indray ny fanambazana efatrefatra ?
Ianareo no mihamatavy , ny vahoaka mihaosa
Nefa mbola asai-milanja irony entam-be mazefatra ?
Malagasy tena maina no terena mbola hitsitsy
F`ianareo handany vola sy hirobaroba foana ?
Ny hitsimbina vahoaka dia tsy hainareo mihitsy,
Tsy ao anaty sainareo ny hoe hijery iretsy noana ?
Malagasy mitomany no terena mbola hifaly
Ka hanafina ny sentony any am-pony tsy miloaka ?
Dia hilaza ianao mpitondra f`efa lasa ny haizi-ngaly
Ka ho avy ny masoandro manazava ny vahoaka ?
… Mety ny misaina kely ry mpitondra diso lalana,
Ary tsaratsara angamba ny mba midina eny ambany.
Ianao izay zatra toerana avo , mipetraha ambony akalana,
Dia ho hitanao akaiky ireo vahoaka mitomany .
SEDERA RAVALISON (10-10-17)
–